Azərbaycanda kəndlər birləşdirilir? – AÇIQLAMA

“Ucqar bölgələrdəki kəndlərin birləşdirilməsi təklifi dəyərləndirilə bilər”.

Bunu Ajans.az-a açıqlamasında Milli Məclisin Regional məsələlər komitəsinin üzvü, deputat Arzuxan Əlizadə deyib. 

Deputat bildirib ki, bu barədə yalnız ciddi araşdırma aparıldıqdan, mütəxəssislər rəy verdikdən sonra qərar verilə bilər:

“Məlumdur ki, ölkədə bələdiyyələrin birləşməsi yolu ilə yeni bələdiyyələrin formalaşması prosesi baş verdi. İlk yaradılarkən 2700 bələdiyyə mövcud idisə, son seçkilər dövründə 1607 bələdiyyə fəaliyyət göstərirdi. Bələdiyyələrin birləşdirilməsindən sonra isə 685 bələdiyyə mövcuddur. 29 yanvarda seçki məhz 685 bələdiyyə üzrə baş tutdu. 

Bu, idarəetmə aparatının mütəhərrik olması baxımından atılmış addımdır. Bu konteksdən yanaşsaq, xüsusən ucqar bölgələrdəki kəndlərin birləşdirilməsi ilə bağlı təklif dəyərləndirilə bilər”.

Arzuxan Əlizadə onu da vurğulayıb ki, burada bir kənddə yaşayanların digər kəndə köçürülərək birləşdirilməsindən söhbət gedə bilməz:

“Bir neçə kəndin idarəetmə sisteminin birləşdirilməsi müzakirə edilə bilər. Burada məqsəd idarəetmə aparatının effektliyini təmin etmək, izafi xərclərdən qurtulmaq, vahid idarəetmə sisteminə keçməklə həmin ərazilərin daha effektli sürətdə idarə edilməsidir. Mütəxəssislərin müsbət rəyləri olacaqsa, bununla bağlı hansısa qərar qəbul edilə bilər”.

Qeyd edək ki, son günlərdə iqtisadçı Eldəniz Əmirov ucqar kəndlərin birləşdirilməsi təklifi ilə çıxış edib.