Deputat: “Almaniya və Azərbaycan arasındakı münasibətlər fonunda mühacir həyatı yaşayan bəzi şəxslər ölkəyə gətirilə bilər”
“Mühacirlərin ölkəyə qaytarılması barədə Azərbaycan tərəfinin hüquqi müstəvidə tələbləri olacaqsa, təbii ki, Almaniya və Azərbaycan arasındakı münasibətlər fonunda məsələ Azərbaycanın tələblərinin yerinə yetirilməsi ilə nəticələnə bilər. Bu, istisna edilmir. Xüsusilə, Azərbaycanın son dövrlər artan nüfuzu, gücü deməyə əsas verir ki, Azərbaycan dövləti bütün proseslərdə haqlı mövqedən çıxış etməklə öz haqqını, hüququnu ən yüksək səviyyədə qorumağa, təmin etməyə qadirdir. Biz artıq belə bir dövlətə çevrilmişik. Almaniya Prezidentinin Azərbaycana səfəri ərəfəsində baş verən xoşagəlməz hadisə buna bariz nümunədir. Almaniya Prezidenti Azərbaycandan əvvəl Ermənistana səfər etmişdi. Bir gün əvvəl səfər ərəfəsində sosial şəbəkə hesabında qondarma qurumun əski parçasını paylaşılmışdı. Bununla bağlı Azərbaycan tərəfi dərhal ciddi reaksiya verdi. Almaniyanın Azərbaycandakı səfiri Xarici İşlər Nazirliyinə çağırıldı. Qarşı tərəf üzr istəməklə öz səhvi, günahı ucbatından yaranmış situasiyaya son qoymuş oldu. Münasibətlər normal məcrada inkişaf etməyə davam edir. Bu, növbəti dəfə Azərbaycanın öz haqlı mövqeyini təmin etmək əzmində olduğunu nümayiş etdirən faktdır. Təbii ki, Azərbaycan hüquqi müstəvidə qanunlara müvafiq qaydada tələb etdiyi şəxslərin qaytarılmasına nail olmaq imkanına da malikdir”.
Bu sözləri Pravda.az-a açıqlamasında Milli Məclisin İnsan hüquqları komitəsinin sədr müavini Arzuxan Əlizadə deyib.
Deputat xatırladıb ki, Azərbaycan-Almaniya münasibətləri 1992-ci ilin yanvarında Almaniya tərəfindən Azərbaycanın müstəqilliyi tanınandan sonrakı dövrə təsadüf edir və artıq 33 illik tarixi var: “1992-ci ildə əsası qoyulmuş münasibətlər ilkin olaraq diplomatik, siyasi, ticari, iqtisadi sahədə artan dinamika ilə inkişaf etdirilib. Bu illər ərzində Azərbaycanın dövlət başçısı, eləcə də Baş nazir, xarici işlər naziri, digər rəsmi şəxslər dəfələrlə Almaniyaya müxtəlif ranqlı qarşılıqlı səfərlər ediblər. İki ölkə arasında münasibətlər hər zaman normal müstəvidə olub. Bu ilin təkcə yanvar-fevral aylarında Azərbaycanla Almaniya arasında iqtisadi, ticari münasibətlər üç dəfə artıb. Azərbaycandan Almaniyaya xam neftin ixracı, eləcə də digər sferalardakı münasibətlər iki ölkə arasındakı siyasi, diplomatik münasibətlərə də müsbət mənada yansımış olur. Müxtəlif sahəli əməkdaşlıq özündə hüquqi müstəvidə də əməkdaşlığı ehtiva edir. Bütün bunlara baxmayaraq, Azərbaycanın əleyhinə olan, Azərbaycanın həqiqətlərini təhrif etməklə Azərbaycana qarşı müxtəlif platformalardan, xüsusilə, sosial şəbəkə üzərindən savaş açan camiyə var. Təəssüf ki, bu camiyə həm də vaxtilə Azərbaycan vətəndaşı olmuş, azərbaycanlıların içindən çıxmış şəxsləri əhatə edir”.
