Türkiyədən MÜHARİBƏ XƏBƏRDARLIĞI – Yaxın Şərqdə gərginlik YENİDƏN ALOVLANIR
Türkiyə hökumətinin PKK-nın tərksilahı ilə bağlı atdığı son addımlar bir sıra xarici qüvvələri əməlli-başlı çaşdırıb. Onlar hər vəclə çalışırlar ki, terror problemi birdəfəlik başa çatsın.
Xatırladaq ki, “Terrorsuz Türkiyə” prosesində PKK-nın tərksilahının 4 aya tamamlanması gözlənilir. Lakin Ankara İsrail və İranın “Terrorsuz Türkiyə” hədəfinə zərər verə biləcəyini nəzərə alaraq bu barədə hər iki ölkəyə sərt şəkildə xəbərdarlıq edib. Xəbərdarlıqda qeyd edilir ki, həmin güclər prosesə əngəl olacaqları təqdirdə, Ankara bunu müharibə səbəbi kimi qiymətləndirəcək və sərt şəkildə reaksiya verəcək.
Məlumatda deyilir ki, İsrail kürdləri bölgədə proksi qüvvəyə çevirməyə çalışır, lakin Türkiyənin bu məsələdə qərarlıdır.
“Biz qarşı tərəfə çatdırmışıq ki, onlardan proksi qüvvə kimi istifadə edilsə və sərhədimizə gətirilsə, bu, müharibə aktı sayılacaq”,-məlumatda bildirilir.
Yaxın Şərqdə gərginlik yenidən artır?
Mövzu ilə bağlı Bizim.Media-ya açıqlamasında Milli Məclisin deputatı Arzuxan Əlizadə bildirib ki, bir sıra qüvvələr Türkiyənin qlobal gücə çevrilməsindən narahatdır:
“Türkiyənin qlobal gücə çevrilməsindən narahat olan bir sıra güclər PKK, YPG kimi qüvvələrdən istifadə etməklə qardaş ölkəyə təhdid yaratmağa çalışırdılar. Uzun illər Türkiyə bu terror təşkilatlarının terror aktlarından əziyyət çəkib. Artıq bu problemin aradan qaldırılması istiqamətində ciddi addımlar atılıb.
Ancaq təəssüf ki, bəzi güclər bu prosesə maneə olmaq, bununla da Türkiyəyə qarşı təhdidlərini davam etdirmək siyasətlərindən əl çəkmirlər. Türkiyənin güclənməsini həzm edə bilməyən güclər ona qarşı yönəldilən proksi qüvvləri yenidən dirçəltməkdə maraqlıdırlar. Məhz buna görə də Ankara İsrail və İrana ciddi mesaj ünvanlayıb”.
“Türkiyə ciddi adekvat addımlar atacaq”
Deputatın fikrincə, həmin proksi qüvvələrdən yenidən Türkiyəyə qarşı istifadə edilməyə çalışılsa, Ankara daha qətiyyətli addımlar atacaq:
“Hazırda Türkiyənin hərbi, iqtisadi, siyasi potensialı imkan verir ki, sözügedən problem yenidən yaranacağı təqdirdə, onun qarşısı beşiyindəcə alınsın. Həmin qüvvələr də bunun fərqindədir. Ona görə də Ankara onlara əvvəlcədən xəbərdarlıq edib və bildirib ki, adekvat cavab veriləcək.
Türkiyə Yaxın Şərq və Suriyada proseslərin normallaşmasında əhəmiyyətli rol oynayıb. Kürd açılımı da yekunlaşmaq üzrədir. Yenidən hansısa qüvvələrin baş qaldırması ehtimalı yaranacaqsa, dərhal və zamanında Türkiyə ciddi adekvat addımlar atacaq. Güman ki, həmin güclər Türkiyənin bu mövqeyini nəzərə alaraq, Ankaraya qarşı məkirli siyasətlərindən əl çəkəcəklər”.
