Afsəddin Nəbiyev: “Paşinyanın KTMT ilə bağlı son qərarını seçkidən sonra regiondakı güclərin düzülüşü müəyyən edəcək”
Ermənistanın KTMT-dən çıxması haqda qərar mövcud vəziyyətdən asılı olaraq qəbul ediləcək. Ermənistan mediasının xəbərinə görə, bu barədə Baş nazir Nikol Paşinyan hökumətin iclasından sonra jurnalistlərə bildirib.
“Sonda biz Kollektiv Təhlükəsizlik Müqaviləsi Təşkilatından çıxacağıq, ya yox – bu artıq başqa məsələdir, bunu deyə bilmərəm. Buna görə də qərarı mövcud vəziyyətdən çıxış edərək verəcəyik” – Baş nazir qeyd edib.
Belə görünür ki, bu dəfəki seçkilərdə Paşinyan ciddi uğur qazansa, Ermənistanın rəsmən KTMT-dən çıxması qaçılmaz olacaq. Yoxsa Paşinyan seçki ərəfəsində Ermənistanın KTMT-dən çıxması haqda qərarın mövcud vəziyyətdən asılı olacağını niyə desin ki?
Sözügedən məsələni bakı-xeber.com-a şərh edən AMİP-in sədr müavini Afsəddin Nəbiyevin fikrincə, Paşinyan başa düşür ki, KTMT-dən çıxmaq Ermənistan üçün strateji və təhlükəsizlik baxımından geriyə dönüşü olmayan bir addımdır: “Bu qədər radikal bir addımı atmaq üçün liderə güclü xalq dəstəyi mandat lazımdır. Əgər o, seçkilərdə böyük fərqlə qalib gəlsə, bunu xalqın onun Qərbə inteqrasiya və Rusiyadan uzaqlaşma kursuna verdiyi təsdiq kimi qələmə verəcək. Seçki nəticələri onun üçün həm daxili müxalifətə, həm də Moskvaya qarşı bir legitimlik qalxanı olacaq. Paşinyanın “vəziyyətdən asılı olaraq qərar verəcəyik” deməsi həm də özü üçün bir manevr imkanı saxlamaqdır. O, qapını tam bağlamır, çünki, KTMT-dən çıxdığı an Ermənistanın təhlükəsizlik çətiri rəsmən yox olur. Əgər Qərbdən – Fransa, ABŞ, Avropa İttifaqından konkret və kəsərli təhlükəsizlik təminatı almasa, o bu addımı atmağa tələsməyə bilər. Mövcud vəziyyət dedikdə o, həm də regiondakı hərbi balansın və Rusiya ilə iqtisadi münasibətlərin enerji asılılığı durumunu nəzərdə tutur. Ermənistanda seçici kütləsi iki böyük qrupa bölünüb. Rusiyanın Ermənistanı “cəzalandırmasından” qorxanlar və Rusiyanın onları “yalnız buraxdığına” inanıb Qərbə meyllənənlər. Paşinyan bu cür bəyanatlarla hər iki qrupa mesaj verir. Qərbmeyllilərə xitab edir ki, mənə səs verin və bu asılılıqdan qurtulaq. Tərəddüd edənlərə isə sətiraltı mesaj ötürür ki, mən radikal deyiləm, vəziyyətə baxıb ağıllı qərar verəcəyəm. Paşinyanın bu sözləri deməkdə məntiqi budur ki, o, KTMT-dən çıxmağı bir siyasi alver predmeti və ya strateji hədəf kimi masada saxlayır. Seçkilərdə qazanılacaq uğur ona bu qərarı vermək üçün həm mənəvi haqq, həm də siyasi güc verəcək. Lakin unutmaq olmaz ki, Ermənistanın iqtisadiyyatı və enerji sektoru hələ də ciddi şəkildə Rusiyadan asılıdır. Paşinyan “çıxa bilərik” deyərək xalqı bu fikrə öyrəşdirir. Lakin son qərarı seçkidən sonra regiondakı güclərin düzülüşü müəyyən edəcək”.
