Arzuxan Əlizadə: “Azərbaycan–Laos münasibətlərində iqtisadi əməkdaşlığın genişləndirilməsi vacibdir”
Azərbaycan Prezidenti İlham Əliyevin Laos Xalq Demokratik Respublikasının Prezidenti Thonqlun Sisulitlə görüşü və səfər çərçivəsində imzalanan sənədlər iki ölkə arasında münasibətlərin inkişafı baxımından əhəmiyyətlidir.
Bu barədə Milli Məclisin deputatı Arzuxan Əlizadə Yenigun.Media-ya açıqlamasında bildirib.
Deputatın sözlərinə görə, Azərbaycanın xarici siyasətində müxtəlif regionlarla əlaqələrin inkişaf etdirilməsi mühüm yer tutur. Laos Prezidentinin Azərbaycana rəsmi səfəri də bu baxımdan diqqət çəkir. Belə təmaslar siyasi dialoqun genişlənməsinə və yeni əməkdaşlıq imkanlarının yaranmasına şərait yaradır.
Arzuxan Əlizadə qeyd edib ki, oktyabrın 13-də iki ölkə arasında Birgə Bəyanatın qəbul edilməsi, kənd təsərrüfatı sahəsində əməkdaşlığa dair Anlaşma Memorandumunun və xidməti pasport sahiblərinin vizadan qarşılıqlı azad edilməsi haqqında Sazişin imzalanması münasibətlərin inkişafı üçün əhəmiyyətli addımlardır.
“Azərbaycan və Laos arasında əməkdaşlığın genişləndirilməsi üçün kifayət qədər imkanlar var. Xüsusilə kənd təsərrüfatı, ticarət, investisiya və turizm sahələrində əlaqələrin inkişaf etdirilməsi qarşılıqlı fayda verə bilər. Bunun üçün sahibkarlar arasında birbaşa təmasların yaradılması və birgə layihələrin həyata keçirilməsi vacibdir”, – deputat bildirib.
Onun fikrincə, imzalanan sənədlərin real nəticələr verməsi üçün konkret fəaliyyət planı hazırlanmalı, aidiyyəti qurumlar arasında əlaqələndirmə gücləndirilməlidir. Siyasi dialoqun iqtisadi əməkdaşlıqla tamamlanması ikitərəfli münasibətlərin daha da möhkəmlənməsinə xidmət edə bilər.
Arzuxan Əlizadə Azərbaycanın əlverişli coğrafi mövqeyinin və nəqliyyat-logistika imkanlarının Asiya ölkələri ilə əlaqələrin genişləndirilməsində əhəmiyyətini də vurğulayıb. O bildirib ki, bu potensialdan istifadə etməklə Azərbaycanla Laos arasında ticarət əlaqələrini inkişaf etdirmək və yeni tərəfdaşlıqlar qurmaq mümkündür.
Deputat hesab edir ki, səfərin nəticələri gələcəkdə konkret iqtisadi layihələr və qarşılıqlı faydalı təşəbbüslərlə möhkəmləndirilməlidir. Bu halda Azərbaycan–Laos münasibətləri siyasi dialoqla yanaşı, iqtisadi və humanitar sahələrdə də yeni mərhələyə qədəm qoya bilər.
