İşğaldan azad edilən torpaqlarda sülh çağırışı – Dünya miqyasında yeni liderlik modeli
“Azərbaycan 1992-ci ildən İqtisadi Əməkdaşlıq Təşkilatının üzvüdür. Bu müddət ərzində ölkəmiz artıq üçüncü dəfədir ki, təşkilatın zirvə toplantılarına ev sahibliyi edir. Əvvəlki iki zirvə görüşü Bakıda keçirilmişdi. Budəfəki – sayca 17-ci zirvə toplantısı isə işğaldan azad olunmuş ərazimizdə, Xankəndidə baş tutdu ki, bu da həm simvolik, həm də siyasi baxımdan böyük əhəmiyyət kəsb edir”
Bu fikirləri Moderator.az-a açıqlamasında Milli Məclisin deputatı Arzuxan Əlizadə səsləndirib.
Deputat bildirib ki, dövlət və hökumət başçılarının iştirakı ilə keçirilən bu zirvə görüşü verdiyi mesajlarla dünyanın diqqətini çəkdi:
“Bütün dünyanın gözü Azərbaycanda, konkret olaraq Xankəndidə idi. İlk dəfə idi ki, Azərbaycanın İqtisadi Əməkdaşlıq Təşkilatının zirvə toplantısı bir həftəlik tədbirlər silsiləsi ilə müşayiət olunurdu. Bu çərçivədə Laçında, Şuşada və Ağdamda təşkilatın qadınlar və gənclər qurumlarının tədbirləri keçirildi, eləcə də biznes forum təşkil olundu. Bu da bir ilk idi.”
Deputat qeyd edib ki, beynəlxalq tədbirlər hər dəfə Azərbaycanın siyasi və iqtisadi gücünü bir daha nümayiş etdirir:
“2023-cü ildə də işğaldan azad olunmuş ərazilərimizdə keçirilən beynəlxalq tədbirləri qeyd etmək istəyirəm. Həmin il İqtisadi Əməkdaşlıq Təşkilatının Nazirlər Şurasının iclası Şuşada keçirilmişdi. 2024-cü ildə isə Türk Dövlətləri Təşkilatının qeyri-rəsmi zirvə görüşü yenə Şuşada baş tutdu. Bu ilin may ayında isə Laçında Azərbaycan, Türkiyə və Pakistan liderlərinin üçtərəfli zirvə görüşü keçirildi”.
A.Əlizadə İran Prezidenti Məsud Pezeşkianın İƏT Zirvə Toplantısında iştirakına da xüsusi diqqət çəkib. Onun sözlərinə görə, Pezeşkian qısa müddət əvvəl prezident seçilməsinə baxmayaraq, artıq ikinci dəfədir ki, Azərbaycana səfər edir:
“Bu səfər çərçivəsində regiondakı münasibətlər, Azərbaycan-İran əlaqələri və ümumilikdə regional problemlərin müzakirə edildiyi ehtimal olunur. Zəngəzur kommunikasiya qovşağı ilə bağlı fikir mübadiləsinin aparılması da böyük ehtimalla gündəmdə olub. Xüsusilə də Azərbaycan, Türkiyə və İran liderləri arasında baş tutan belə görüşlər regionda dayanıqlı sülh və sabitliyin qurulması istiqamətində atılan önəmli addım kimi qiymətləndirilməlidir”.
Deputat əlavə edib ki, Azərbaycanın bu görüşlərə ev sahibliyi etməsi və əsas təşəbbüskar rolunda çıxış etməsi onun regiondakı artan nüfuzunun göstəricisidir:
“Bu, bir tərəfdən Azərbaycanın bölgədə yeni reallıqlar yaratdığını, digər tərəfdən isə artıq güclü bir dövlət kimi regionda söz sahibi olduğunu göstərir.
Azərbaycanın yerləşdiyi coğrafi mövqe də bu baxımdan mühüm əhəmiyyət daşıyır. Azərbaycan Şimal-Cənub və Şərq-Qərb nəqliyyat dəhlizlərinin kəsişməsində yerləşir. Bu da ölkəmizin strateji əhəmiyyətini artırır. Prezident İlham Əliyevin regiondakı prosesləri uğurla idarə etməsi və həyata keçirdiyi siyasət Azərbaycanın bu mərkəzi mövqeyini daha da möhkəmləndirir.
Gələcəkdə də region dövlətləri arasında münasibətlərin məhz Azərbaycanın təşəbbüsü və liderliyi ilə inkişaf etdirilməsi bölgənin tərəqqisinə xidmət edəcək. Eləcə də bu prosesdə maraqlı olan beynəlxalq güclər Azərbaycanın regionda əsas oyunçuya çevrildiyi reallığı ilə barışmalı olacaqlar. Belə mötəbər tədbirlərin keçirilməsi isə Azərbaycanın bu rolunu bir daha təsdiqləyir”.
