“Hər iki dövlətin müstəqil xarici siyasəti və diplomatik mövqeyi var” – Deputatın açıqlaması
Azərbaycan nümayəndə heyətinin BMT Baş Assambleyasında İsrailin Baş naziri Benyamin Netanyahunun çıxışı zamanı davranışı Türkiyədə müzakirələrə səbəb olub. Lakin nümayəndə heyətinin altı üzvündən beşinin zalı tərk etdiyi faktı hadisənin fərqli təqdim edildiyini göstərir.
Azərbaycan-Türkiyə münasibətlərinin strateji və qardaşlıq xarakteri fonunda Bakının öz xarici siyasətini və diplomatik davranışını müstəqil şəkildə müəyyənləşdirməsi iki ölkə arasındakı münasibətlər baxımından xüsusi əhəmiyyət daşıyır.
- Azərbaycan nümayəndə heyətinin beş üzvünün zalı tərk etməsi faktının Türkiyədəki müzakirələrdə ön plana çıxarılmaması hadisənin yanlış siyasi təqdim edilməsinə səbəb ola bilərmi?
- Türkiyə və Azərbaycan arasında strateji tərəfdaşlıq və qardaşlıq münasibətləri fonunda belə diplomatik məsələlər ətrafında emosional reaksiyaların qarşısının alınması üçün hansı yanaşma daha məqsədəuyğundur?
Milli Məclisin deputatı Arzuxan Əlizadə Bizimyol.info xəbər portalına açıqlamasında bildirib ki, Azərbaycan nümayəndə heyətinin BMT Baş Assambleyasındakı davranışı ilə bağlı Türkiyədə aparılan müzakirələrdə məsələnin bütün detalları ilə birlikdə təqdim olunması vacibdir.
Deputat qeyd edib ki, altı nəfərlik nümayəndə heyətinin beş üzvünün zalı tərk etməsi faktı da nəzərə alınmalıdır. Onun sözlərinə görə, hadisənin yalnız müəyyən bir görüntü və ya məqam üzərindən qiymətləndirilməsi yanlış təsəvvürlərin yaranmasına və məsələnin olduğundan fərqli təqdim edilməsinə səbəb ola bilər.
Arzuxan Əlizadə vurğulayıb ki, Azərbaycan-Türkiyə münasibətləri strateji tərəfdaşlıqdan daha geniş məna daşıyır və iki ölkəni tarixi, milli və mənəvi bağlar birləşdirir.
“Bununla belə, hər iki dövlətin beynəlxalq məsələlərdə özünün müstəqil xarici siyasəti və diplomatik mövqeyi var. Bu müstəqillik qardaşlıq münasibətlərinə zidd deyil, əksinə, dövlətlərarası münasibətlərin sağlam və qarşılıqlı hörmət prinsipləri əsasında inkişafının göstəricisidir.
Belə məsələlər ətrafında emosional yanaşmalardan daha çox faktlara və real vəziyyətə əsaslanmaq məqsədəuyğundur. Azərbaycan və Türkiyə arasında münasibətlərin yüksək səviyyəsi nəzərə alınaraq, ayrı-ayrı diplomatik hadisələrin iki ölkə arasında münasibətlərə xələl gətirəcək formada təqdim edilməsinə yol verilməməlidir. Əsas məsələ qarşılıqlı etimadın, strateji tərəfdaşlığın və qardaşlıq münasibətlərinin qorunmasıdır”, – deyə deputat bildirib.
