“Naxçıvanın blokadadan çıxması regionda sülhün, əməkdaşlığın və iqtisadi inteqrasiyanın möhkəmlənməsi deməkdir” – RƏY
“Prezident İlham Əliyevin Naxçıvana səfəri yalnız muxtar respublikanın sosial-iqtisadi inkişafı baxımından deyil, bütövlükdə Azərbaycanın regional mövqeyinin gücləndirilməsi və Cənubi Qafqazda yeni nəqliyyat-kommunikasiya xəritəsinin formalaşması baxımından mühüm əhəmiyyət daşıyır. Naxçıvanın uzun illər blokada şəraitində qalmasına baxmayaraq, dövlət başçısının daim diqqət və qayğısı nəticəsində burada genişmiqyaslı infrastruktur layihələri həyata keçirilib, sosial-iqtisadi inkişaf üçün mühüm baza yaradılıb. Bu gün isə regionda yaranan yeni geosiyasi reallıqlar Naxçıvanın əhəmiyyətini daha da artırır. Azərbaycanın nəqliyyat imkanlarının genişlənməsi, kommunikasiyaların bərpası, Türkiyə və İranla nəqliyyat əlaqələrinin inkişafı, eləcə də Ermənistanla sülh gündəliyinin irəliləməsi Naxçıvanın regional bağlantıların mühüm həlqəsinə çevrilməsi üçün yeni imkanlar yaradır”.
Bu sözləri Pravda.az-a açıqlamasında Milli Məclisin deputatı Arzuxan Əlizadə deyib.
A.Əlizadə vurğulayıb ki, xüsusilə Zəngəzur istiqamətində kommunikasiyaların açılması Naxçıvanın Azərbaycanla birbaşa nəqliyyat əlaqələrinin güclənməsinə, Türkiyəyə çıxışın genişlənməsinə və Şərqlə Qərb arasında yük və logistika marşrutlarının şaxələndirilməsinə ciddi töhfə verə bilər: “Bu proses Azərbaycanın tranzit potensialını artırmaqla yanaşı, ölkəmizin Cənubi Qafqazda və daha geniş coğrafiyada nəqliyyat-logistika mərkəzi kimi mövqeyini möhkəmləndirəcək. Naxçıvanın həm Türkiyə, həm İran, həm də gələcəkdə Ermənistan üzərindən regional kommunikasiyalara inteqrasiyası onun iqtisadi və geosiyasi çəkisini əhəmiyyətli dərəcədə artıracaq. Prezident İlham Əliyevin həyata keçirdiyi siyasətin əsas nəticələrindən biri də Azərbaycanın uzun illər mövcud olmuş kommunikasiya məhdudiyyətlərini aradan qaldıraraq yeni bağlantılar yaratmasıdır. Bu baxımdan Naxçıvanın blokadadan çıxması sadəcə nəqliyyat məsələsi deyil, həm də regionda sülhün, əməkdaşlığın və iqtisadi inteqrasiyanın möhkəmlənməsi deməkdir. Əminəm ki, qarşıdakı dövrdə Naxçıvan Cənubi Qafqazın ən mühüm geosiyasi məkanlarından birinə, Şərqlə Qərbi birləşdirən yeni nəqliyyat və iqtisadi qovşaqlardan birinə çevriləcək. Azərbaycanın regional siyasəti və həyata keçirilən infrastruktur layihələri bu proses üçün bütün əsasları formalaşdırır”.
