Arzuxan Əlizadə: “Ramiz Mehdiyevə qarşı irəli sürülən bu ittihamlar onun təkbaşına törədə biləcəyi cinayətlər deyil”

Məlum olduğu kimi, oktyabrın 14-də Bakı şəhəri Səbail Rayon Məhkəməsi Ramiz Mehdiyev barədə cinayət işi üzrə qərar qəbul edib. Məhkəmə xüsusilə ağır cinayət əməllərinə görə cinayət məsuliyyətinə cəlb edilmiş R.Mehdiyev barədə verilmiş vəsatəti təmin edərək 4 ay müddətinə ev dustaqlığı qətimkan tədbiri seçib. O Cinayət Məcəlləsinin 278.1 (dövlət hakimiyyətini ələ keçirməyə yönələn əməllər), 274 (dövlətə xəyanət) və 193-1.3.2-ci (cinayət yolu ilə əldə edilmiş əmlakı leqallaşdırma) maddələri ilə ittiham olunur. Bu arada yayılam məlumata görə, R.Mehdiyev işi ilə əlaqədar prosesə cəlb edilən şəxslər var. AXCP sədri Əli Kərimli və partiyanın rəyasət heyətinin üzvü Məmməd İbrahimin Dövlət Təhlükəsizliyi Xidmətində dindirilmələri məlum olub. Onlar barələrində aparılan araşdırma çərçivəsində dindiriliblər. AXCP sədri Əli Kərimli və onun müşaviri evində axtarış aparılması zərurəti bir müddətdir yaranıb. Belə ki, bu səbəbdən bu gün hər iki şəxsin evində axtarışlar aparılıb. Hazırda istintaq Ramiz Mehdiyevlə Əli Kərimli arasında cinayət məsuliyyəti yaradan əlaqələri araşdırır. 

Bu hadisələrlə bağlı AMİP sədri, millət vəkili Arzuxan Əlizadənin mövqeyini öyrəndik. 

Arzuxan Əlizadə Azinforum.az-a açıqlamasında R.Mehdiyev barəsində dövlətə xəyanət, hakimiyyəti zorla ələ keçirmə və küllü miqdarda mənimsəmə maddələri ilə cinayət işi başlanıldığını diqqətə çatdıraraq bildirdi ki, “Bir müddətdir sözügedən məsələ olduqca ciddi müzakirə mövzusudur və gündəmi zəbt edən əsas məsələdir desək yanılmarıq. O da məlumdur ki, R.Mehdiyevə qarşı irəli sürülən bu ittihamlar onun təkbaşına törədə biləcəyi cinayətlər deyil. Bu, kifayət qədər ciddi bir komandanın işləyib hazırladığı və hayata keçirmək istədiyi dövləti cinayətdir. O cümlədən, R.Mehdiyevin adının arxasında sürpriz isimlərin ola biləcəyini də əvvəlcədən demişdim. Dünəndən artıq bu proses növbəti mərhələyə qədəm qoyub. Artıq AXCP sədri Əli Kərimli, Milli Şuranın rəhbərliyində təmsil olunan Gültəkin Hacıbəyli və digərləri istintaqa cəlb edilibdilər. Bir neçəsinin evində axtarışlar aparılıb və istintaq orqanı iş üzrə bir sıra ifşaedici materiallar əldə edib. Təbii ki, bunun nəticəsi olaraq həmin şəxslərin istintaqa cəlb ediləcəyi şübhə doğurmur. Bu, əslində ölkədə fəaliyyət göstərən bir siyasi partiya adına çox böyük ləkədir. Ölkə siyasi partiyaları birmənalı olaraq ölkə qanunları çərçivəsində fəaliyyət göstərməli, dövlət və milli maraqlara üstünlük verməli və “öncə vətəndir” devizi ilə fəaliyyətlərini qurmalıdılar. Digər dövlətlərin maraqlarına xidmət etmək, digər dövlətlərin maliyyələşdirdiyi layihələrdə iştirak etmək, bu, birmənalı olaraq dövlətə xəyanət kimi qəbul edilir və çox ciddi surətdə cəzalandırılmalıdır. 

Azərbaycanda bir neçə dəfə dövlət hakimiyyətini zorla ələ keçirmək və zorakı yolla hakimiyyəti devirmək cəhdləri olubdur. Bu da növbəti bir cəhddir. Ümid edirəm ki, sonuncu olar. Çünki sona qədər bu prosesdə iştirak edən, təşkilatçılıq edən, prosesin əsas aparıcı qüvvələri olan istənilən şəxs bundan qabaqkı dönəmdə hansı xidmətləri olmağından asılı olmayaraq və hansı vəzifələrdə təmsil olunmağından asılı olmayaraq ən sərt surətdə cəzalandırılmalıdır. Yəni bu dəstə kökündən qazılmalıdır ki, bir də Azərbaycanda kimsə hakimiyyəti zorla ələ keçirməyə cəhd etməsin. Digər ölkələrə xidmət etməklə hansısa qanunsuz işi törətməyə imkanı olmasın. Hansısa partiya təmsilçisinin buna getməsi utanc olmaqla yanaşı, həm də böyük dövləti cinayətdir”. 

Millət vəkili A.Əlizadə açıqlamasında xüsusilə vurğuladı ki, zamanında bunun simptomları görünürdü: “O zaman da demişdim ki, R.Mehdiyev sıradan bir fiqur deyil. O, elə bir adioz fiqur idi ki, ətrafına müəyyən bir dəstə toplamaq imkanlarına malik idi. Onun siyasi cameyədə müəyyən pərdəarxası, arxa qapıdan maliyyələşdirdiyi, idarə etdiyi və istənilən vaxt özünə işlədə biləcəyi qüvvələrin olduğu da məlum idi. Bu gün isə artıq konkret adlar ortalıqdadır. Ehtimallar böyükdür və istintaqla çox ciddi araşdırmalı, üzə çıxarılmalı məsələlər var. Hələ  2013-cü il president seçkiləri ərəfəsində meydana atılmış Milli Şura ideyası, həmin antimilli qurumda kimlərin təmsil olunması, milyanerlər İttifaqının yaradılması və qonşu dövlətdən maliyyələşməsi, Rusiya tərəfindən Azərbaycanda bu adamlar vasitəsi ilə çevrilişə cəhdlər edilməsi kimi məsələləri bir daha xatırlasaq və dərindən təhlil etsək görərik ki, bu gün baş verənlər təsadüfi və sıradan hadisələr deyil. Bütün bunlar yaxın tarixdə baş verib. Həmin dönəmdə də bu gün cinayət işində adları keçən şəxslər – Əli Kərimli və digərləri bütün proses boyu olduqca fəal idilər. O zaman da bu adamlar çox gözəl bilirdilər ki, bu prosesin arxasında hansı qüvvələr dayanır və haradan maliyyələşdirilirlər. Ancaq təəssüf ki,  istənilən fürsətdən istifadə edərək öz şəxsi və siyasi qrup maraqlarını təmin etmək naminə Ramiz Mehdiyev kimi şəxslərə əlaltılıq etmək bunların xisləti olubdur. O üzdən də bu gün biz belə bir mənzərə ilə qarşı-qarşıyayıq. Hər kəs anlamalıdır ki, dövlət maraqlarını digər maraqlara qurban verirsənsə və xəyanət yolu tutursansa nəticə etibarı ilə cəzalandırılacaqsan. 

Mən bir daha xüsusi xidmət orqanlarının peşəkarlığına arxalanaraq inanıram ki, cinayət işi sona qədər obyektiv aparılacaq. Adları keçən şəxslərin sözügedən prosesdə iştirakı sona qədər müəyyənləşdiriləcək. mövqeyimiz isə budur ki, kimlər bu prosesdə iştirak edibsə, zorakı yolla dövlət hakimiyyətini ələ keçirmək məqsədi ilə fəaliyyət göstəriblərsə, keçmişdə hansı xidmətlər göstərmələrindən asılı olmayaraq ən sərt formada cəzalandırılmalıdılar ki, bir daha Azərbaycan dövlətinə qarşı kimsə fəaliyyət göstərmək həvəsinə düşməsin”.