Paşinyanın “Yeni Sardarapat” mesajı nə demək idi?
2020-ci il iyulun 12-də Tovuz istiqamətində baş verən hərbi toqquşmalar Azərbaycan-Ermənistan münasibətlərində gərginliyi daha da artırdı. Ardınca Nikol Paşinyanın döyüşləri “Yeni Sardarapat” kimi təqdim etməsi və Azərbaycana bir sıra şərtlər irəli sürməsi qarşıdurmanın siyasi müstəvidə də sərtləşdiyini göstərdi.
- Tovuz hadisələri regiondakı hərbi-siyasi vəziyyətə necə təsir etdi?
- Paşinyanın hadisələrdən sonra Azərbaycana şərtlər irəli sürməsi hansı məqsədə xidmət edirdi?
Milli Məclisin deputatı Arzuxan Əlizadə Bizimyol.info xəbər portalına açıqlamasında bildirib ki, 2020-ci ilin iyulunda Tovuz istiqamətində baş verən hərbi toqquşmalar Azərbaycan-Ermənistan münasibətlərində onsuz da gərgin olan vəziyyəti daha da kəskinləşdirdi. Burada mühüm məqamlardan biri ondan ibarət idi ki, qarşıdurma Qarabağdakı təmas xəttində deyil, Azərbaycan-Ermənistan dövlət sərhədində baş verdi. Ağır artilleriyanın tətbiqi ilə müşayiət olunan döyüşlər nəticəsində hər iki tərəfdən hərbçilər, Azərbaycan tərəfdən isə mülki şəxs həlak oldu. Hadisələr beynəlxalq ictimaiyyətin də diqqətini regiona yenidən yönəltdi və münaqişənin nə qədər kövrək vəziyyətdə olduğunu göstərdi:
“Tovuz hadisələrinin digər mühüm nəticəsi regionun strateji və kommunikasiya əhəmiyyətinin bir daha ön plana çıxması oldu. Tovuz istiqaməti Azərbaycanın enerji və nəqliyyat infrastrukturu baxımından mühüm coğrafiyada yerləşir. Bu səbəbdən dövlət sərhədində hərbi gərginliyin yaranması yalnız Azərbaycan-Ermənistan münasibətləri çərçivəsində deyil, daha geniş regional təhlükəsizlik kontekstində də narahatlıq doğururdu. Qarşıdurmadan sonra tərəflər bir-birini hadisələrin başlanmasında ittiham etsə də, aydındır ki, iyul döyüşləri 2020-ci ilin payızında baş verəcək daha genişmiqyaslı müharibəyə aparan gərginlik zəncirinin mühüm mərhələlərindən birinə çevrildi”.
Deputat bildirib ki, Nikol Paşinyanın döyüşləri “Yeni Sardarapat” kimi təqdim etməsi və bunun fonunda Azərbaycana müxtəlif şərtlərin irəli sürülməsi siyasi ritorikanın sərtləşdiyini göstərirdi.
“Bu yanaşma həm daxili auditoriyaya güc nümayiş etdirmək, həm də danışıqlar prosesində Ermənistanın mövqeyini daha sərt şəkildə təqdim etmək məqsədi daşıyırdı.
Lakin belə ritorika onsuz da zəifləmiş etimad mühitinin bərpasına xidmət etmirdi, əksinə, tərəflər arasında siyasi və hərbi gərginliyin daha da dərinləşməsinə şərait yaradırdı. Tovuz hadisələri bir daha göstərdi ki, münaqişənin həlli istiqamətində real siyasi iradə və konstruktiv yanaşma olmadıqda, sərt bəyanatlar və qarşılıqlı ittihamlar vəziyyəti daha təhlükəli mərhələyə gətirib çıxara bilər”, – deyə o bildirib.
