Etibar Məmmədov – 70
Şəxsiyyət
Onunla ilk tanışlığımın əsası ötən əsrin son qərinəsində – 1992-ci ilin iyul ayının 2-də boy almışdı. Çox dəyərli, izzətli qohumum, fəzilətli insan, şücaətli iş adamı Məhəmməd Həbulla oğlu Bəşirov hər ikimiz üçün münasib vaxt seçərək elə yenicə mücadilə təşnəsi tapan azadlıq aşiqlərinin “ilk qaranquş” adlandırdıqları AMİP partiya qərargahında (Bakı şəhərinin Binəqədi rayonunda) bizim üçün ilk görüş müsamirəsi təşkil etdi. Onu da deyim ki, bu məkanda məskunlaşan sakinlərin əksəriyyəti deportasiyaya məruz qalan qaçqın, qaçqınlıq, köçkünlük, didərginlik görmüş, ağır iztirablara düçar olmuş insanlar olduğundan demək olar ki, hər həftənin şənbə günü tərəfdaşlıq mövqeyi göstərən milli istiqlalçılarla səmimi görüşən, icma halında yaşayan, Qərbi Azərbaycandan olan həmvətənlərimizlə günün aktual məsələləri barədə təfərrüatlı görüşlər keçirərdilər. O illərin möhnət dolu ağır məqamlarını yaxşı xatırlayıram.
Hər bir Azərbaycanlı övladı milli mücadilə oyanışında xalqa, vətənə bağlı mərdanəlik nümayiş etdirərək dövrün, zamanın tələbinə uyğun siyasi mövqe mədəniyyəti göstərir, müstəqil Azərbaycanın ilk strateji ictimai-tərəqqi ideyalarını xalq hərəkatı ilə birləşdirməyin metodoloji prinsiplərini şüurlu şəkildə ictimai mündəricəli milli mənlik şüuru ilə çulğalaşdırırdılar. Belə məqamlarda isə hiyləgər, yağı düşmənə qarşı mübarizə yolunda dövrün ziyalılarının, məslək və əqidə cəfakeşlərinin inam və etiqad yolunu özünün şərəfli və ibrətamiz həyat məramnaməsi bilən şair Bəxtiyar Vahabzadə, Xəlil Rza Ulutürk, Məmməd Araz kimi tarixi şəxsiyyətlər sırasında gənc, müdrik xarakterə qabil olan Etibar Səlidar oğlu Məmmədovun milli təlatümləri oyadan cəsarətli çıxışları meydanlara, izdiham dolu, geniş kütləyə təsir göstərən partiyalı tərəfdaşlara sonsuz dərəcədə örnək olurdu.
Bu yolun müzəffər əsgəri isə çox idi. Xüsusən, Azərbaycan Milli İstiqlal Partiyasının sadiq üzvlərinin böyük bir qismi ideya və məslək yolunda çətin, lakin şərəfli fədakarlıq göstərərək ölkəmizdə milli müstəqillik ideyalarını hərtərəfli inkişafa qadir şəxsiyyətlər vasitəsilə nümayiş etdirirdilər. Belə əzəmətli mübarizə ehtişamını öz çiyinlərində daşıyan, ümumxalq və ümumdövlət səviyyəsini hər şeydən uca tutan, hər bir mücadilə platformasını ağıllı tələb əsasında quran, yenilməz iradi səy və qayğı ilə xalqın etimadını qazanan, xalqın azadlıq yoluna çıraq tutan və “Etibar bəy” titulu qazanan, elə bu adla da məşhurlaşan gənc Etibar Məmmədov oldu.
Haşiyə:
Bu yolun keşməkeşli anlarında, məşəqqətdolu məqamlarında birmənalı olaraq öz haqq və ədalət strategiyasını Vətən azadlığı yolunda yüksək zirvələrə qaldıran Etibar Məmmədovun həyatından bəhs etmək olduqca maraqlı və ibrətamizdir. Keçilən ömrün həyat səhifələrini vərəqlədikcə maraqlı fraqmentlər bir daha xəyalında canlanır, yaşamağın və yaşatmağın qədir-qiymətini bilirsən. Müasir Azərbaycanımız üçün başucalığı gətirən münəvvər şəxsiyyətlər sırasında qədim-qayın keyfiyyətləri, ictimai-siyasi baxışları ilə onu şöhrətləndirən övladlarına daha bünövrəli təməl üzərində qurulan ömür-gün arzulayırsan. Həyatının 70 illik yubiley təntənəsinə çıraq tutan, AMİP partiyasının lideri, dövlətçiliyə, milliliyə, demokratizmə, humanizmə, xəlqiliyə güvənib, Azərbaycanımızı dünya arenasında ləyaqətlə təmsil edən, beynəlxalq aləmdə öz siyasi-ictimai platformasını azad fikir, tolerant düşüncə, milli oyanış və bütöv Azərbaycan ehtişamı ilə birləşdirən, mübarizə yolunda daima xalqına nicat nuru gətirən Etibar Məmmədov gələcək fəaliyyətində də xalqımıza, onun xoşbəxt günlərinə aydın çıraq tutacaqdır. Biz buna tam inanırıq.
Bunu isə bizdən həyatın özü tələb edir.
Vidadi Bəşirov,
Pedaqogika üzrə fəlsəfə doktoru, dosent
15.03.2025
