Deputat: “Quru sərhədlər açılsa, təkcə soydaşlarımızın deyil, İranın digər vətəndaşlarının da xaotik şəkildə ölkəmizə keçməsi baş verə bilər”
“Soydaşlarımızın əksər hissəsi Təbrizdə və Cənubi Azərbaycanın digər ərazilərində yaşayırlar. Dinc insanlar arasında itkilər olsa da, həmin ərazilər çox ciddi raket atəşinə məruz qalmır. Daha çox Tehran hədəf alınıb. Təbii ki, Tehranda da kifayət qədər soydaşlarımız yaşayır. Bizdə olan məlumata görə, onların böyük əksəriyyəti Təbrizə və Cənubi Azərbaycanın digər bölgələrinə, öz qohumlarının evlərinə gedir, sığınacaq tapırlar. Quru sərhədlər açılsa, təkcə soydaşlarımız deyil, İranın digər vətəndaşlarının da xaotik şəkildə ölkəmizə keçməsi baş verə bilər. Bu da indiki zamanda olduqca böyük təhlükələr yaradacaq, çünki kimlərin hansı ad altında gələcəyini qısa müddətdə yoxlamaq çətin olar. Lakin öz soydaşlarımıza təhlükə yaranacaqsa, Azərbaycan tərəfi bununla bağlı ciddi təhlükəsizlik tədbirləri görməklə sərhədləri qismən aça bilər. Çünki onların sığınacaqları yer ya Azərbaycan, ya da Türkiyə olacaq. Biz onlara kritik məqamda öz dəstəyinizi verməliyik. Bu, qaçılmazdır”.
Bu sözləri Pravda.az-a açıqlamasında Milli Məclisin İnsan hüquqları komitəsinin sədr müavini Arzuxan Əlizadə deyib.
Sədr müavini eyni zamanda bildirib ki, indiki şəraitdə isə quru sərhədlərin açılması mümkün deyil: “Məlumdur ki, Azərbaycanın quru sərhədlərinin qapanması əslində məhz təhlükəsizlik səbəbi ilə edilib. Son baş verən hadisələr – istər Rusiyada Ukrayna xüsusi xidmət orqanları tərəfindən həyata keçirilən “hörümçək toru” əməliyyatı, istərsə də münaqişənin başladığı ilk gün İranda içəridən vurulma faktları deməyə əsas verir ki, əslində quru sərhədləri bağlı saxlamaqda təhlükəsizlik baxımından çox doğru addım atmışıq. İndi bir sıra xarici ölkələrin müraciəti əsasında bəzi xarici ölkə vətəndaşları və diplomatik nümayəndəliklərdə çalışan şəxslər İran-Azərbaycan sərhədindən keçməklə Azərbaycan üzərindən öz ölkələrinə gedirlər. Bu, humanitar addımdır. Baş verən hadisələr fonunda quru sərhədlərin tam olaraq açılması nəinki risklidir, eyni zamanda ciddi surətdə təhlükəlidir”.
