Müharibələri dayandıran LİDER – Tramp Nobel Sülh Mükafatına LAYİQDİR
Xəbər verdiyimiz kimi Amerika Birləşmiş Ştatlarının Prezidenti Donald Tramp, Azərbaycan Respublikasının Prezidenti İlham Əliyev və Ermənistan Respublikasının Baş naziri Nikol Paşinyan avqustun 8-də Ağ Evdə keçirilən görüşlərdən sonra mətbuata bəyanatla çıxış ediblər.
Bəyanatda maraqlı nüanslar da yer alıb.
Daha çox maraq doğuran nüanslardan biri isə Amerika Prezidentinin Nobel Sülh mükafatına namizədliyinin irəli sürülməsi idi.
İlham Əliyev çıxışında bu məsələyə xüsusi diqqət çəkib:
“Bəs əgər Nobel Sülh Mükafatı Prezident Trampa verilməsə, kimə verilməlidir? Mən heç bir iş görməmiş, lakin mükafat almış şəxslərlə bağlı Nobel Sülh Mükafatının çox müəmmalı qərarlarının tarixinə varmaq istəməzdim. Lakin Prezident Tramp altı ay ərzində möcüzə yaratdı. Bir sözlə, düşünürəm ki, erməni həmkarım da dəstəkləyəcək. Auditoriyanın reaksiyasından hesab edirəm ki, biz qayıdan kimi birgə məktubun hazırlanması üzərində razılığa gələcəyik”, – deyə Azərbaycan Prezidenti bildirib.
Təbii ki, Azərbaycan liderinin təşəbbüsünə Nikol Paşinyan da dəstək verib. O da öz çıxışında Prezident Tramp Nobel Sülh Mükafatına layiq olduğunu bildirib.
Tramp Nobel Sülh mükafatına layiqdirmi?
Məsələyə Azərbaycanın milli və dövlət maraqları baxımında çıxış edərək deməliyik ki, Tramp Nobel Sülh mükafatına layiqdir. Çünki o, 35 ildən artıq davam edən qanlı münaqişənin sonlanmasına öz töhfəsini verdi. Halbuki onun sələfi Co Bayden açıq şəkildə Ermənistanı yeni müharibəyə təşviq edir, bunun üçün Ermənistana hər cür dəstək göstərirdi. Eyni zamanda Konqresdəki ermənipərəst qüvvələr də erməni diasporundan aldıqları qonorar qarşılığında rəsmi Vaşinqtonu hər zaman Azərbaycana təzyiq etməyə çağırıblar.
Nəzər alaq ki, 44 günlük müharibə dövründə də ABŞ Prezidenti Donald Tramp idi. O müharibə boyu öz təmkinini və bitərəfliyini saxladı. Məhz ABŞ-ın bitərəf mövqeyi Avropadakı bəzi ermənipərəst qüvvələrin əl-qolunu bağladı. Nəticədə Azərbaycan öz ərazi bütövlüyünü və suveren hüquqlarını bərpa etdi.
“Trampın Nobel Sülh mükafatına layiq görülməsi Azərbaycanın maraqlarına uyğundur”
Mövzu ilə bağlı fikirlərini Bizim.Media ilə bölüşən AMİP sədri, Millət vəkili Arzuxan Əlizadə deyir ki, Amerika lideri dünyada davam edən münaqişələri ən azından lokallaşdırmağa çalışır:
“Ukrayna-Rusiya münaqişəsinin sonlandırılması üçün təşəbbüsləri göz önündədir. Bu ilin may ayında yenidən alovlanan Hindistan-Pakistan münaqişəsi də məhz Amerika liderinin təşəbbüsü ilə dayandırıldı. Yaxın Şərqdə qanlı müharibə də artıq səngiyib. Bütün bunların hamısında fövqəlgüc olan ABŞ-ın və onun liderinin xüsusi payı var.
Azərbaycan maraqlarından baxanda da Trampın Nobel Sülh mükafatına layiq görülməsi doğru olardı. 35 ildən artıq davam edən qanlı münaqişə sonlanırsa, Cənubi Qafqaza davamlı sülh gəlirsə, onda biz niyə Trampın namizədliyini dəstəkləmiyək?! Avqustun 8-də Ağ Evdə imzalanan sənədlər göstərir ki, Tramp sözün həqiqi mənasında müharibəyə yox, daha çox sülhə yönəlik fəaliyyət göstərir. Onun xarici siyasəti ölkəmizə sülh və əmin-əmanlıq gətirirsə, o zaman Trampən bu mükafata namizədliyini dəstəkləmək ən doğru seçimdir”.
BAP-ın sədri, Millət vəkili Elşad Musayev də Trampın Nobel Sülh mükafatına namizədliyinin dəstəklənməsinin tərəfdarı olduğunu bildirib:
“Avqustun 8-də Azərbaycan Prezidenti İlham Əliyevlə Ermənistanın baş naziri Nikol Paşinyan Donald Trampın Nobel Sülh mükafatına namizədliyi üçün müraciət edəcəklərini bildiriblər. Bizim partiyanın mövqeyi ondan ibarətdir ki, əgər sülh müqaviləsi bağlanacaqsa, iki ölkə arasında normal münasibətlər yaranırsa, Zəngəzur dəhlizi açılırsa, 907-ci düzəliş aradam qaldırılırsa, ATƏT-in Minsk qrupu tarixin arxivinə gömülürsə, o zaman Donald Trampın Nobel Sülh mükafatına namizədliyinin irəli sürülməsini biz ancaq alqışlayırıq”.
