Afsəddin Nəbiyev: “Görünən odur, Rusiya Ermənistanda seçkilər ərəfəsində bütün resurslarını işə salacaq”
Ermənistan parlamentinin sədri Alen Simonyan Rusiyanın ölkəsinə qarşı hibrid müharibə apardığını bildirib. Onun sözlərinə görə, Moskva Ermənistana təzyiq göstərmək üçün medianın gücündən istifadə edir:
“Rusiya hibrid müharibə ilə hazırda siyasi cəbhəmizdə kəşfiyyat işləri ilə məşğuldur. Onlar araşdırma aparır, müxtəlif mövzuları irəli sürür, acınacaqlı məqalələr hazırlayır, intriqalar yaradır və çirkin ssenarilər uydururlar”.
Simonyan əlavə edib ki, bu cür nəşrlər sadəcə hücumları sifariş edən və həyata keçirən şəxslərin üslubunu nümayiş etdirir: “Onların səhvi erməni mentalitetini yanlış başa düşmələrindədir. Hətta erməni soyadlı çoxsaylı manqurtlar belə sizə kömək etməyəcək. Ona görə də çox çalışmayın, sadəcə özünüzü yoracaqsınız”.
Bu, rəsmi səviyyədə Rusiyanın ünvanına səsləndirilən ən sərt ittihamlardan biridir.
Sözügedən məsələni “Bakı-Xəbər”ə şərh edən AMİP-in sədr müavini Afsəddin Nəbiyevin fikrincə, Simonyanın Rusiya ilə bağlı səsləndirdiyi kəskin ittihamlar İrəvanın xarici siyasətindəki köklü dəyişikliklərin və Moskvadan uzaqlaşmağa yönəlmiş siyasi kursun ən bariz göstəricisidir: “Bu bəyanat sadəcə diplomatik insident deyil. Ermənistan iqtidarının Rusiyanın Cənubi Qafqazdakı təsir dairəsindən qurtulmaq cəhdini ictimaiyyətə açıq şəkildə çatdırmasıdır. Simonyanın dediyinə görə, Rusiya Ermənistana təzyiq göstərmək üçün xüsusilə media gücündən istifadə edir, siyasi cəbhədə kəşfiyyat aparır, “acınacaqlı məqalələr”, “intriqalar” və “çirkin ssenarilər” uydurur. Bu iddialar, Ermənistan cəmiyyətində Rusiyameylli qüvvələrin fəallaşması və dezinformasiya kampaniyalarının intensivləşməsi ilə bağlı narahatlıqları əks etdirir. Əsas məqsəd isə Ermənistanın müstəqil dövlət kimi inkişafına əngəl törətmək və onu Kremlin geosiyasi maraqlarına xidmət edən bir siyasi alətə çevirməkdir. Bu açıqlamanın mahiyyətini baş nazir Nikol Paşinyanın son zamanlar xalqa etdiyi müraciətlər daha da gücləndirir. Paşinyan dəfələrlə açıq şəkildə bildirib ki, Rusiyanın Ermənistanı Cənubi Qafqazda “siyasi alət” kimi istifadə etməsi ölkənin dövlət müstəqilliyini və inkişafını ciddi şəkildə təhdid edir. İrəvan rəhbərliyi hesab edir ki, Moskva ilə hərbi-siyasi əməkdaşlığın Ermənistanın təhlükəsizliyinə qarantiyası yoxdur. Nəticədə, Ermənistan öz suverenliyini tam bərpa etmək və Qərb istiqamətində diversifikasiya siyasəti yürütmək zərurəti ilə üz-üzədir. Simonyanın Rusiya ilə əməkdaşlıq edənlərə qarşı işlətdiyi “erməni soyadlı çoxsaylı manqurtlar” ifadəsi isə hibrid müharibənin daxili cəbhəsini hədəf alır. O, bununla sapı özlərindən olan “baltaların” Ermənistanın müstəqil siyasət yürütmək əzminə heç bir zərər verə bilməyəcəklərinə açıq şəkildə eyham vurur. Bu, həm daxili müxalifətə, həm də diaspor daxilində Rusiyanın təsirini gücləndirməyə çalışan şəxslərə yönəlmiş sərt bir xəbərdarlıqdır. İrəvan bu cür daxili qüvvələrin xarici sifarişlərlə Ermənistanın müstəqil kursuna zərbə vurmasını əngəlləmək niyyətindədir. Nəticə olaraq, Simonyanın bəyanatı və Paşinyan administrasiyasının ümumi ritorikası Ermənistanın Rusiya ilə münasibətlərində yeni bir mərhələyə qədəm qoyduğunu və öz milli maraqlarını regional hegemonluqdan üstün tutmaq əzmində olduğunu göstərir. Buradan da belə qənaətə gəlmək mümkündür ki, Rusiya Ermənistanda seçkilər ərəfəsində bütün resurslarını işə salacaq. O cümlədən, Qərbə inteqrasiyanın tərəfdarlarına qarşı təzyiqlərini artıracaq”.
